भन्सार छलेर ल्याइएको ४० लाखका सामान बरामद

विराटनगर । दसैँ, तिहारजस्ता मुख्य पर्व नजिकिएसँगै भारतबाट अवैध रुपमा मालसामान भित्र्याउने क्रम बढेको छ । कपडा, विद्युतीय सामान जस्ता सामान भन्सार छलेर भित्रने क्रम बढेको हो ।

यही क्रममा प्रहरीले विराटनगर १२, रोडशेष चोकमा अवैध रुपमा ल्याइएको कपडा नियन्त्रणमा लिएको छ ।

आइतबार अपराह्न प्रहरी टोलीले करिब ४० लाख रुपैयाँ बराबरको सामान नियन्त्रणमा लिएको हो ।

ट्याक्टरमा लोड गरेर ल्याइएका सामानसहित प्रहरीले चालक जहदाका १९ वर्षीय रमेश यादवलाई नियन्त्रणमा लिएको छ ।

नियन्त्रणमा लिइएका सामान, साधन र चालकलाई कारबाही प्रक्रियाका लागि इटहरीस्थित राजस्व कार्यालय पठाइएको मोरङ प्रहरीका प्रवक्ता डीएसपी दीपक श्रेष्ठले बताए ।

तस्बिर सौजन्य: मोरङ प्रहरी